U nënshkrua marrëveshje bashkëpunimi mes Universitetit të Prizrenit dhe Bibliotekës Kombëtare dhe Universitare të Kosovës

U nënshkrua marrëveshje bashkëpunimi mes Universitetit të Prizrenit dhe Bibliotekës Kombëtare dhe Universitare të Kosovës



Në ambientet e Universitetit Publik të Prizrenit, të hënën, është nënshkruar marrëveshje bashkëpunimit nw mes UPZ-së dhe Bibliotekës Kombëtare dhe Universitare të Kosovës për anëtarësimi i UPZ-së në Asociacionin e Bibliotekave Elektronike të Kosovës dhe shfrytëzimin e burimeve dhe materialeve elektronike të nevojshme. Marrëveshjen e bashkëpunimit e kanë nënshkruar Rektori i UPZ-së, Prof. Dr. Mazllum Baraliu, dhe Drejtori i BKUK-së Prof. Dr. Sali Bashota. Me këtë rast, drejtori i BKUK-së ka dhuruar edhe një kontingjent librash për Bibliotekën e Universitetit të Prizrenit.

Rektori i Universitetit Publik të Prizrenit e ka vlerësuar shumë të rëndësishme nënshkrimin e kësaj marrëveshje për studentët e këtij universiteti dhe ka falënderuar drejtorin e BKUK-së për angazhimin dhe bashkëpunimin që kjo po realizohet.

Edhe drejtori i BKUK-së, Prof. Dr. Sali Bashota, e ka vlerësuar shumë të rëndësishme për të dyja institucionet nënshkrimin e kësaj marrëveshje.

“Kjo është një marrëveshje e rëndësishme për BKUK-në dhe UPZ-në, duke ditur faktin se rektori dhe stafi po bëjnë përpjekje që ky universitet të jetë modern, me programe të shumta për avancimin e dijes, shkencës dhe mendimit profesional, i rëndësishëm për këtë pjesë të Kosovës”, ka theksuar Bashota, duke shtuar se tani e tutje UPZ po i bashkëngjitet konsorciumit të bibliotekave elektronike të Kosovës.

“Ky është një fillim i mbarë i punës së përbashkët, që do të vazhdoj edhe në të ardhmen”, ka thënë ai.





Datë: 19.03.2012 REKTORATI