Caktohen çmimet për pasaportat biometrike

Prishtinë, 06 tetor 2011
Ministri i Punëve të Brendshme i Republikës së Kosovës, Bajram Rexhepi, të enjten ka marrë vendim për caktimin e tarifave për marrjen e pasaportave biometrike të Republikës së Kosovës.
Në një komunikatë të lëshuar nga Zyra e ministrit Rexhepi, njoftohet se për marrjen e pasaportës biometrike të Republikës së Kosovës, qytetarët duhet të paguajnë këto shuma:

Për marrjen e pasaportës për herë të parë, çmimi është 30 euro;
Për marrjen e pasaportës të humbur, apo dëmtuar, për ndërrim apo ripërtëritje të dhënave, çmimi është 35 euro;
Për marrjen e pasaportës për fëmijë deri në moshën 3 vjeç, çmimi është 20 euro;
Për marrjen e pasaportës për fëmijë prej 3 deri në 18 vjeç, çmimi është 25 euro;
Për marrjen e pasaportës diplomatike, çmimi është 50 euro;
Për marrjen e pasaportës zyrtare, çmimi është 35 euro;
Çmimi i pasaportës biometrike për pensionistët është 20 euro.

Ky vendim është marrë duke u mbështetur në nenin 145 (pika 2) të Kushtetutës së Republikës së Kosovës, duke marrë parasysh nenet 4, 21, 22 të Ligjit për Administratën Shtetërore të Republikës së Kosovës, si dhe duke u bazuar në nenin 8 (paragrafi 1.4) dhe shtojcën 3 të Rregullores për fushat e përgjegjësisë administrative të Zyrës së kryeministrit dhe ministrive, si dhe në Ligjin për dokumente të udhëtimit.
Ndryshe gjatë mbledhjes së djeshme ministri Rexhepi ka prezantuar tarifat e pasaportave, ndërsa nga kabineti qveritar iu kërkua ministrit Rexhepi që të ketë ulje të çmimeve, dhe në vendimin e minsitrit Rexhepi, krahasuar me çmimet e propozuara dje, është zbritur çmimi për 5 euro për të gjitha pasaportat.